Sentyabrın 2-də Vyanada keçirilən “Mədəniyyətlərarası bağlılığın uzun gecələri” mədəniyyət həftəsi çərçivəsində Azərbaycana həsr olunan bədii axşam təşkil olunub.
Tədbirin həmtəşkilatçısı Beynəlxalq Mədəni Müxtəliflik Təşkilatının (BMMT) rəhbəri Yosipa Palaç uğurlu əməkdaşlığa görə Azərbaycan Mədəniyyət Mərkəzinin rəhbərinə təşəkkür edib, beynəlxalq qurumun mədəniyyətlərarası dialoqun inkişafı üçün keçirdiyi layihələrə Azərbaycanın töhfəsini yüksək qiymətləndirib.
Sonra tədbir iştirakçılarına azərbaycanlı rəssam və heykəltəraş Elvin Nəbizadənin “LOST LAND” videoinstallasiyası təqdim olunub. Çörək, onun Azərbaycan cəmiyyətində qəbul olunan simvolik və məcazi xüsusiyyətləri, eləcə də insanın çörəyi itirməklə qarşılaşdığı fəlakətli vəziyyətin əks olunduğu görüntülər tamaşaçılar tərəfindən maraqla qarşılanıb.
Azərbaycanda “Multikulturalizm ili” çərçivəsində ərsəyə gələn və Azərbaycanda məskunlaşmış etnik qruplara həsr olunan “Bir günəş altında” sənədli filmi nümayiş edilib.
Azərbaycan Dövlət Rəqs Ansamblının solistləri Alina Qontareva, Valeriya Konkina, Nurlan Rza-zadə və Eldar Hüseynovun ifasında “Qarabağ”, “Naz eləmə”, “Ağ çiçəyim”, “Sarı gəlin” və digər Azərbaycan milli musiqi nümunələri məharətlə ifa olunub. Rəqqasların ifası tədbir iştirakçıları tərəfindən böyük maraq və alqışlarla qarşılanıb.
Qeyd edək ki, Beynəlxalq Mədəni Müxtəliflik Təşkilatı tərəfindən keçirilən “Mədəniyyətlərarası bağlılığın uzun gecələri“ mədəniyyət həftəsi sentyabrın 6-dək davam edəcək.
