Azərbaycan Mədəniyyət Mərkəzində görkəmli caz musiqiçisi, saksofonçu, klarnet ifaçısı, bəstəkar, dirijor, Azərbaycan Televiziya və Radiosunun estrada simfonik orkestrinin (1960-1981) əfsanəvi bədii rəhbəri və baş dirijoru, Azərbaycan Xalq artisti Tofiq Əhmədovun 100 illik yubileyinə həsr olunmuş konsert keçirilib.
Yubiley konserti “Musiqi sevinc bəxş edir“ (“Musik macht Freude - MmF”) Vyana musiqi məktəbi tərəfindən “Culture Meeting Point” Vyana mədəniyyət təşkilatı, Vyana meriyası, “Sun Dance Company” rəqs studiyası və Azərbaycan Mədəniyyət Mərkəzinin dəstəyi ilə musiqi məktəblərinin və Vyana şəhər gimnaziyalarının şagirdlərinin iştirakı ilə təşkil olunub.
Tədbirin girişində “Musiqi sevinc gətirir” musiqi məktəbinin rəhbəri və “Culture Meeting Point” mədəniyyət təşkilatının musiqi rəhbəri, sənətşünaslıq üzrə fəlsəfə doktoru Fərəh Tahirova qonaqları salamlayıb T.Əhmədovun Azərbaycan caz musiqisinin inkişaf tarixində oynadığı əhəmiyyətini, o cümlədən 21 il rəhbərlik etdiyi Azərbaycan Televiziya və Radiosunun estrada simfonik orkestrinin onun yaradılmasında və sonrakı fəaliyyətində mühüm rolundan bəhs edib. T. Əhmədovun Azərbaycanın tanınmış diplomatı, ölkəmizin Avstriyadakı səfiri olmuş mərhum Fuad İsmayılovun babası olduğunu xatırladan F. Tahirova yubiley tədbirinin Avstriyada keçirilməsinin bu baxımdan simvolik məna kəsb etdiyini diqqətə çatdırıb, musiqiçinin şəxsi arxivindən foto və digər materialları bu tədbir üçün təqdim etdiklərinə görə ailə üzvlərinə xüsusi minnətdarlıq edib.
Həmçinin qeyd edilib ki, Şərqlə Qərb arasında musiqi mübadiləsi və mədəni körpü məqsədinə xidmət edən və Avstriya ilə Azərbaycan arasında mədəni əlaqələrin inkişafına yönələn konsertdə T. Əhmədovun əsərləri ilə yanaşı Azərbaycan bəstəkarı Qara Qarayevin, məşhur Avstriya bəstəkarlarının və müxtəlif musiqi dövrlərinə aid bir çox digər Avropa bəstəkarlarının əsərləri də yer alır.
Konsert uşaqların T. Əhmədovun yaradıcılığı haqqında maraqlı təqdimatları ilə müşayiət olunub, T.Əhmədovun məşhur bəstələri və unudulmaz aranjemanlarının ifasında fotoarxivi də təqdim olunub.
Musiqi məktəbi və şəhər gimnaziyalarının şagirdlərinin məşhur əsərlərdən ibarət ifası, T.Əhmədovun sevilən mahnıları və “Sun Dance Company” rəqs studiyasının tələbələrinin ifası gecənin qonaqları tərəfindən böyük maraq və maraqla qarşılanıb.
Beynəlxalq fortepiano müsabiqələrinin laureatı, istedadlı gənc pianoçu və bəstəkar, Vyana Dövlət Operası xorunun solisti, 13 yaşlı Norbert Ebner konsertində T. Əhmədovun məşhur “Give me a smile” (“Güldür məni”) mahnısını, həmçinin T. Əhmədovun yubileyinə həsr olunmuş “Günəşli vals” bəstəsini ifa edib.
Gecədə Vyanada fəaliyyət göstərən müxtəlif diaspor təşkilatlarının nümayəndələri, Azərbaycanın Vyanadakı səfirliyinin əməkdaşları, avstriyalı musiqiçi və alimlər, T.Əhmədovun ailə üzvləri iştirak ediblər.
