Vyanada Azərbaycan Mədəniyyət Mərkəzində görkəmli pianoçu, pedaqoq və Azərbaycan fortepiano mədəniyyətinin tarixinə həsr olunmuş ilk elmi tədqiqatın müəllifi Fəridə Xəlilovanın 90 illik yubileyi münasibətilə təntənəli tədbir keçirilib.
Tədbir zamanı çıxışlarda Fəridə Xəlilovanın həyat və yaradıcılıq yoluna geniş nəzər salınıb. Bildirilib ki, o, Bakıda tanınmış riyaziyyatçı Zahid Xəlilovun ailəsində, sahil bulvarına və Bəhram Gur fəvvarəsinə yaxın ərazidə yerləşən məşhur Alimlər Evində böyüyüb. Bu məkan uzun illər boyunca alimlərin, musiqiçilərin və yazıçıların bir araya gəldiyi, fikir mübadiləsi apardığı xüsusi mədəni mühit kimi tanınıb. Həmin evdə görkəmli yazıçı Mir Cəlalın da yaşadığı vurğulanıb və bu mühitin açıq düşüncənin, mədəni dialoqun formalaşmasında mühüm rol oynadığı qeyd edilib.
Təhsil almaq üçün Leninqrada yollanan Fəridə Xəlilova burada onun həm yaradıcılıq yolunda, həm də şəxsi həyatında mühüm rol oynamış bir şəxsiyyətlə tanış olub. Bu şəxs XX əsrin ən tanınmış tenorlarından biri olan Vladimir Atlantovdur. Tanınmış sənətkar yubiley tədbirinin fəxri qonağı qismində iştirak edib.
Tədbir çərçivəsində Fəridə Xəlilova və Vladimir Atlantovun qızı Lada Atlantova ilə Azərbaycan Mədəniyyət Mərkəzində baş tutmuş simvolik görüş də xüsusi qeyd olunub. Bu görüş bir daha göstərib ki, ortaq xatirələr, həyat yollarındakı oxşarlıqlar və mədəni köklər insanları vətəndən uzaqda belə bir araya gətirə bilir. Bakıda, Alimlər Evində formalaşmış mühitdə böyümək, eyni şəhərin havasını udmaq kimi ortaq xatirələr bu mənəvi yaxınlığın əsasını təşkil edib.
Çıxışlarda vurğulanıb ki, mədəniyyət ilk növbədə insanlar vasitəsilə yaşayır – şəxsi münasibətlər, paylaşılmış xatirələr və nəsildən-nəslə ötürülən mənəvi dəyərlər sayəsində.
Tədbirin mühüm məqamlarından biri Bakı Musiqi Akademiyasının rektoru, tanınmış pianoçu və professor Fərhad Bədəlbəylinin fəxri qonaq qismində iştirak etməsi olub. Bununla yanaşı, tədbirdə bir sıra musiqiçilər də iştirak edərək axşama xüsusi bədii ovqat bəxş ediblər.
Yubiley gecəsi Fəridə Xəlilovanın zəngin həyat və yaradıcılığına ehtiram nümunəsi kimi dəyərləndirilib və musiqinin, xatirələrin və şəxsi talelərin ölkələr və nəsillər arasında mədəni körpülər yaratmaq gücünü bir daha nümayiş etdirib.
